აშშ–ის სახელმწიფო მდივანმა ჯონ კერიმ მიულოცა საქართველოს და მოლდოვას 28–29 ნოემბერს ვილნიუსის აღმოსავლეთ პარტნიორობის სამიტზე ევროკავშირთან ასოცირების შესახებ შეთანხმებების და ღრმა და ყოვლისმომცველი თავისუფალი ვაჭრობის ხელშეკრულებების „ისტორიული" პარაფირება.

„მივესალმებით საქართველოს და მოლდოვას კანონის უზენაესობის, დემოკრატიის და თავისუფალი ბაზრების გაძლიერების გამო. ევროკავშირის აღმოსავლეთ პარტნიორობის პროგრამის მიზნების შესრულება ერთ–ერთი საიმედო გზაა ევროპისკენ, თავისუფალი და მშვიდობიანი", – განაცხადა კერიმ 29 ნოემბერს.

აშშ–ის სახელმწიფო მდივანმა, რომელიც მომავალ კვირას მოლდოვას ესტუმრება, ასევე განაცხადა, რომ აშშ „ძლიერ მხარდაჭერას" უცხადებს საქართველოს და მოლდოვას ევროატლანტიკურ ინტეგრაციას.

„კიდევ ერთხელ ვადასტურებთ ჩვენს მზადყოფნას, გავაღრმავოთ პარტნიორობა საქართველოს და მოლდოვას ხალხებთან, და განვაგრძობთ მათი მთავრობების მხარდაჭერას მაშინ, როდესაც ისინი საფუძველს უყრიან უფრო ფართო ევროპულ ინტეგრაციას და უკეთეს და უფრო წარმატებულ მომავალს", – განაცხადა მან.